काठमाडौँ- पूर्वराष्ट्रपति विद्यादेवी भण्डारीले आफू एमालेको सदस्यता नवीकरण गरिसकेको बताउँदै, नागरिकको सामाजिक वा राजनीतिक अधिकार कसैले खोस्न नसक्ने टिप्पणी गरेकी छिन्। राष्ट्रपतिको कार्यकाल जस्तो आवधिक पद समाप्त भएपछि जोसुकैले पुनः सामाजिक जीवनमा फर्केर राजनीति गर्न पाउने अधिकार रहेको उनले बताएकी छन्।

सोमबार विराटनगर विमानस्थलमा पत्रकारहरुसँग कुरा गर्दै उनले आफू अझै पनि एमालेकी संगठित सदस्य र कार्यकर्ता भएको बताएकी छन् । “मैले ४५ वर्षसम्म एमालेमा योगदान गरेकी छु, त्यसैले सधैं पार्टीको नीति र सिद्धान्तअनुसार पार्टीकै हितमा लागिरहन्छु,” भण्डारीले भनिन्।

भण्डारीले पार्टी सदस्यता नवीकरण नगर्ने केन्द्रीय समितिको निर्णयबारे भने आफूलाई आधिकारिक जानकारी नभएको उल्लेख गरिन्। गत साउन १४ गते उनले सक्रिय राजनीतिमा फर्कने घोषणा गरेकी थिइन् तर त्यसपछि एमाले केन्द्रीय समितिले उनको सदस्यता खारेज गरेको थियो।