चीनले फिलिपिन्सका राष्ट्रपति फर्डिनान्ड मार्कोस जुनियरको ताइवानबारेको अभिव्यक्तिप्रति तीव्र आपत्ति जनाएको छ। भारत भ्रमणका क्रममा मार्कोसले ताइवानसँग भौगोलिक नजिकता र ठूलो फिलिपिनी समुदायको ताइवानमा बसोबास रहेको कारण चिन ताइवान युद्ध भए फिलिपिन्स युद्धमा तानिने र ताइवानको पक्षमा उभिने बताएका थिए।

चीनको विदेश मन्त्रालयले शुक्रबार मार्कोसको भनाइलाई “आन्तरिक मामिलामा हस्तक्षेप” भन्दै एक–चीन नीतिको सम्मान गर्न चेतावनी दिएको छ । दक्षिण चीन सागरमा दुवै मुलुकबीच विगत केही वर्षयता तनाव बढिरहेको छ।

मार्कोसको भारत भ्रमणमा फिलिपिन्स–भारतबीच सेनादेखि नौसेना र वायुसेनासम्मको सुरक्षा सहकार्य सम्झौता भएको छ। भारतीय युद्धपोतले हालै विवादित सागर क्षेत्रमा फिलिपिनी नौसेनासँग संयुक्त गस्ती सुरु गरेका छन्, जसले चीनलाई थप आक्रोशित बनाउने देखिन्छ।

यसैबीच, फिलिपिन्सले चिनियाँ रकेटको टुक्रा पश्चिमी प्रान्त नजिक खसेको भन्दै आपत्ति जनाएको छ। दक्षिण चीन सागरमा बढ्दो तनावमा अमेरिकाले पनि फिलिपिन्सको रक्षा गर्ने वाचा दोहोर्याएको छ। यधपी चीनले आफ्नो एक चिन नीतिप्रति कसैको दबदबा नसहने र त्यसको कडा प्रतिकार गर्ने बताउँदै आएको छ।