रूपन्देही —आगामी कार्तिक १७ गते हुने रूपन्देही-३ को प्रतिनिधिसभा उपनिर्वाचनका लागि राष्ट्रिय स्वतन्त्र पार्टीले अनलाइन आवेदन प्रणालीमार्फत इच्छुक उम्मेदवारहरूबाट नाम मागेकोमा ९ जनाले उम्मेदवारी दाबी गरेका छन्।

साउन ७ देखि सुरु भई साउन २१ गते सकिएको आवेदन प्रक्रियामा रूपन्देही क्षेत्रभित्र र बाहिर रहेर पार्टीमा सक्रिय व्यक्तिहरूको चासो देखिएको छ।

पार्टीले सार्वजनिक गरेको सूचीमा सुलभ खरेल, पाथवेन्द उपाध्याय, डा. लेखजंग थापा, ज्ञानु पौडेल, जितबहादुर गुप्ता, कुसुम महर्जन, रचना क्षेत्री, पुनकुमारी अग्रवाल र मधुप्रसाद अर्याल छन्।

तिनीहरूमध्ये मधुप्रसाद अर्याल, ज्ञानु पौडेल, कुसुम महर्जन, सुलभ खरेल र डा. लेखजंग थापालाई मुख्य प्रतिस्पर्धीको रूपमा हेरिएको छ। पार्टीले भदौ १५ गते अन्तिम उम्मेदवार घोषणा गर्ने जनाएको छ।

रूपन्देही-३ लाई रास्वपाले संगठन विस्तार र जनमत पुनर्निर्माणको अवसरका रूपमा लिएको छ। पार्टीका अनुसार उम्मेदवार चयन पूर्णतः आन्तरिक निर्वाचन प्रक्रियामार्फत हुनेछ। सहमहामन्त्री तथा लुम्बिनी प्रदेश इन्चार्ज विपिन आचार्यले भदौ १२ र १३ गते मतदान भई १५ गते उम्मेदवारको औपचारिक घोषणा हुने जानकारी दिएका छन्।

२०७९ को आमनिर्वाचनमा रास्वपाले रूपन्देही-३ बाट समानुपातिकतर्फ १४ हजार मत प्राप्त गर्दै तेस्रो स्थान हासिल गरेको थियो। प्रत्यक्षतर्फ उम्मेदवार जितबहादुर गुप्ताले ५७९६ मत ल्याएका थिए। करिब १ लाख ३० हजार मतदाता रहेको यस क्षेत्रमा ९० हजार मत खसेको थियो, जसका आधारमा सो क्षेत्रमा कांग्रेस पहिलो दलको रुपमा देखिएको छ।