हेटौडा – बागमती प्रदेशको मुख्यमन्त्री बहादुर सिंह लामामाथि अविश्वाशाको प्रस्ताव दर्ता गर्ने तयारि हुँदैछ।

९ साउन २०८१ मा लामाले मुख्यमन्त्री पदको सपथ लिंदा काँग्रेसकै अर्का नेता इन्द्रबहादुर बानियाँलाई वर्ष दिनपछि पद छोड्नुपर्ने गरि कांग्रेस सभापति शेरबहादुर देउवा निवासमा लिखित सहमति भएको र हाल वर्ष दिन पुगेपछि सहमतिअनुसार मुख्यमन्त्री लामाले राजीनामा नदिएपछि सांसदहरू र मन्त्री आफैँले दबाब दिनुपरेको काँग्रेस निकट श्रोतले बताएको छ ।

लामालाई दवाब दिनकै लागि बागमती प्रदेशका चार मन्त्रीहरुले राजिनामा समेत दिएका छन्। राजिनामा दिनेहरुमा आन्तरिक मामिला तथा कानुन मन्त्री सुरजचन्द्र लामिछाने, युवा तथा खेलकुद मन्त्री मिनकृष्ण महर्जन र संस्कृति तथा पर्यटन मन्त्री विमल ठकुरी र सहकारी तथा गरिबी निवारणमन्त्री मधुकुमार श्रेष्ठ रहेका छन्।

बागमती प्रदेश सभामा रहेका कांग्रेसका ३७ सांसदमध्ये २४ जनाले बागमती संसदीय दलको नेता चयनको लागि चुनाव गर्न हस्ताक्षर समेत बुझाएका छन्।

बागमती प्रदेश सरकारमा मुख्यमन्त्री सहित १४ वटा मन्त्रालय रहेका छन्। जसमध्ये सत्ता गठबन्धनमा आबद्ध दल नेकपा एमालेका ६ जना मन्त्री र कांग्रेसबाट सरकारमा ८ जना मन्त्री रहेका छन्।