काठमाडौं – संसदको हिउँदे अधिवेशन आज दिउँसो १ बजेको लागि तय भएको छ। सरकारले संसदमा प्रस्तुत गर्ने विधेयक र अध्यादेशलाई लिएर प्रतिपक्ष दलहरुले आज संसदमा विरोध गर्ने बताइरहेका बेला सत्तारुढ दल नेपाली काँग्रेसकै सांसदहरु अध्यादेशको विपक्षमा देखिएका छन्।

आफ्नै सांसदहरु विपक्षमा देखिएपछि यतिबेला नेपाली कांग्रेस संसदीय दलको बैठक बस्दैछ। बैठकमा आजबाट सुरु हुने हिउँदे अधिवेशनका बारेमा छलफल हुने र सांसदहरुलाई अध्यादेशको विपक्षमा नबोल्न आग्रह गर्न र संसदमा एकमतका साथ् अगाडी बढ्नुपर्ने भन्दै बैठक डाकिएको हुन सक्ने काँग्रेस नेताहरुले बताएका छन्। तीनजनाबाहेक कांग्रेसका सबै सांसद सरकारले ल्याएको अध्यादेशको विपक्षमा रहेको बुझिएको छ।

त्यसो त नेपाली काँग्रेसका महामन्त्री गगन थापा र विश्वप्रकाश शर्माले खुलेरै सञ्चार माध्यमहरुमा सरकारले ल्याएको सामाजिक सञ्जाल विधेयकको विरोध गर्दै त्यसलाई सच्याउनु पर्ने बताइसकेका छन् भने अन्य सांसदहरुले पनि सरकारले संसदीय समितिमा छलफल नै नगरी आफुलाई अनुकुल हुने गरि विधेयक ल्याएको र अध्यादेश मार्फत सरकार सँचालन गर्नु गलत अभ्यास भएको भन्दै सरकारको कदमको आलोचना गरेका छन्।