एमालेका पूर्व उपाध्यक्ष भीम रावलले प्रधानमन्त्री ओलीले भ्रष्टाचार र निरंकुशतालाई बढावा दिएको आरोप लगाएका छन्।

बुधबार काठमाडौंमा पत्रकार सम्मेलन गर्दै रावलले सर्वोच्च अदालतका न्यायाधीश कुमार रेग्मी र एमाले उपाध्यक्ष विष्णु पौडेलका छोरा नवीन पौडेलविरुद्ध ललिता निवास जग्गा भ्रष्टाचार काण्डमा मुद्दा दायर नगर्न अख्तियार दुरुपयोग अनुसन्धान आयोगलाई ओलीले निर्देशन दिएको आरोप लगाउँदै उनको आलोचना समेत गरेका छन्।

‘अवैध रूपमा लिइएको जग्गा फिर्ता गरेपछि रेग्मी र पौडेलविरुद्ध मुद्दा चलाउनै पर्दैन भन्ने ओलीको निर्देशनमा अख्तियारले निर्णय गरेको हो ? चोरेको सम्पत्ति फिर्ता भएकोले मात्रै चोरी माफी दिने कानुन छ ?” रावलले प्रश्न गरे । यस्ता कार्यले जवाफदेहितालाई कमजोर बनाउने र शक्तिको दुरुपयोग भएको रावलको दाबी छ ।

रावलले ओलीले अहंकार र बहिष्कारको नीति अपनाएको भन्दै त्यसले एमालेभित्र द्वन्द्व निम्त्याएको बताए । ‘म ओलीको पूर्वाग्रहको सिकार भएँ । यो स्पष्टीकरण थियो वा आरोपपत्र?” रावलले आफूलाई पार्टीबाट निष्कासन गरेको भन्दै प्रश्न गरे ।

साथै, रावलले प्रमुख राजनीतिक दलहरूले भ्रष्टाचार र विदेशी हस्तक्षेप निम्त्याएको आरोप लगाए। सत्ताका भोका नेताहरूले आफ्नो स्वार्थ पूरा गर्न सुशासनको दुरुपयोग गरिरहेका छन्,’ उनले थपे।

एमाले सचिवालयले पार्टीलाई कमजोर बनाएको आरोप लगाएर नेता रावललाई पार्टीको साधारण सदस्य समेत नरहने गरि पार्टीबाट निष्काशन गरेको थियो भने अन्य दुई जनालाई ६ महिनाको लागि पार्टीको जिम्मेवारी बाट निलम्बन गरेको थियो।