काठमाडौँ – “जेन जी” आन्दोलनका क्रममा भदौ २३ र २४ गते भएका हत्या, हिंसा, आगजनी लगायतका फाैजदारी अपराधका घटनाको छानबिन सम्बन्धमा गृह मन्त्रालयले असाेज ९ गते जारी गरेको विज्ञप्तिमा जाँचबुझ आयाेगकाे प्रतिवेदन आएपछि मात्रै कारबाही गर्नु भनेकोमा, जाँचबुझ आयाेगका अध्यक्ष गाैरीबहादुर कार्कीले जाँचबुझ आयाेगकाे प्रतिवेदन कुर्न नपर्ने बताएका छन् ।

कार्कीले भदौ २३ र २४ गते भएका फाैजदारी कानुन आकर्षित हुने घटनाको छानबिन नियमित कानुनी प्रक्रियामा गर्न अवरोध नपुग्ने बताएका छन् ।

भदौ २३ र २४ भदौमा जेन–जी आन्दोलनमा भएको दमन र प्रदर्शनकारीका कारण भएको विध्वंसको जाँचबुझ गर्न सरकारले विशेष अदालतका पूर्वअध्यक्ष गौरीबहादुर कार्कीको अध्यक्षतामा तीन सदस्यीय उच्चस्तरीय जाँचबुझ आयोग गठन गरेको थियो ।