भैरहवा – विपद र प्रतिकूल मौसमका कारण सार्वजनिक यातायात अवरुद्ध भएपछि गन्तव्यमा पुग्न नसकेका यात्रुलाई उद्धार गर्न नेपाल वायुसेवा निगमले सोमबार विशेष राहत उडान सञ्चालन गरेको छ। निगमको एयरबस ए-३२० जहाजले भैरहवाबाट १५७ यात्रु बोकेर काठमाडौं फर्किएको हो।

सरकारको अनुरोधमा यो उडान सञ्चालन गरिएको हो। यो राहत उडान अशक्त, बिरामी र वैदेशिक रोजगारका लागि तयारीमा रहेका व्यक्तिहरूलाई लक्षित गरिएको थियो। निगमले आइतबार राति ९ बजेका लागि अनुमति लिएको भए पनि प्राविधिक कारण सोमबारको लागि समय परिवर्तन गरिएको थियो।

आन्तरिक उडान स्थगित भएपछि यात्रुको भीड बढेको कारण सरकारले सम्बन्धित निकायहरूसँग समन्वय गरी राहत उडानको व्यवस्था गरेको हो।