काठमाडौं – परराष्ट्र मन्त्रालयले १ हजार १७१ जना नेपाली नागरिक हाल विदेशी जेलमा रहेका भएको पुष्टि गरेको छ।

मन्त्रालयले संघीय संसद सचिवालयलाई दिएको लिखित जवाफअनुसार विभिन्न मुलुकका जेलमा १ हजार १७१ जना नेपाली नागरिकले कारागार सजाय भोगिरहेका छन्। तीमध्ये सात जनालाई आजीवन कारावासको सजाय सुनाइएको छ। तर कुन मुलुकमा कति नेपाली छन् र उनीहरूलाई के कस्ता मुद्दामा सजाय भएको हो भन्ने विवरण भने सार्वजनिक गरिएको छैन।

मन्त्रालयका अनुसार विदेशी जेलमा रहेका नेपालीलाई त्यहाँका नेपाली नियोगमार्फत कानुनी र कन्सुलर सहयोग उपलब्ध गराइएको छ।

सरकार नेपाली नागरिकहरू विदेशी भूमिमा कानुनी समस्यामा परेमा आवश्यक सहयोग र सहजीकरण गर्न कटिबद्ध रहेको मन्त्रालयले स्पष्ट पारेको छ।