काठमाडौँ- उपप्रधान तथा गृहमन्त्री नारायणकाजी श्रेष्ठले नेपाल र चीनले ‘बेल्ट एन्ड रोड इनिसिएटिभ’को कार्यान्वयन योजनामा ‘छिट्टै’ हस्ताक्षर गर्ने बताएका छन् । यधपी उनले यो कहिले र कसरि गर्ने भन्ने विषयमा भने केहि बताएका छैनन्।

नेपाल र चीनले २०१७ मा बीआरआई सम्बन्धी समझदारी पत्रमा हस्ताक्षर गरेको भएपनि लगभग सात वर्षदेखि सो अन्तर्गतको कुनै पनि परियोजना कार्यान्वयन भएको छैन।

सिल्क रोड युथ फोरम र दक्षिण एसियाली सहयोग सम्मेलनको एक कार्यक्रमलाई सम्बोधन गर्दै श्रेष्ठले कार्यान्वयन योजनामा हस्ताक्षर गरेपछि मात्रै कार्यान्वयनको चरणमा जाने बताएका छन्।

कनेक्टिभिटी अभिवृद्धि र आर्थिक सहयोगलाई प्रवद्र्धन गर्ने लक्ष्य राखेको बेल्ट एन्ड रोड इनिसिएटिभले दुई देशबीच सहकार्यका नयाँ बाटो खोलेको बताउँदै नेपाल–चीन सहकार्यको आधारशिला पूर्वाधार विकास भएको बताए ।

‘सडक, पुल, ऊर्जा आयोजनाजस्ता महत्वपूर्ण पूर्वाधार निर्माणमा चीनको सहयोगले नेपाललाई आर्थिक वृद्धि र स्थायित्वतर्फ लैजान महत्वपूर्ण भूमिका खेलेको र यी परियोजनाहरू मार्फत बढाइएको कनेक्टिभिटीले द्विपक्षीय सम्बन्धलाई मात्र बलियो बनाउँदैन तर क्षेत्रीय सहयोग र एकीकरणको फराकिलो दृष्टिकोणमा पनि योगदान पुर्‍याउँछ, उनले भने।

नेपाल र चीनबीचको बीआरआई कार्यान्वयन योजनामा हस्ताक्षर सन् २०२० को शुरुदेखि नै प्रमुख एजेन्डा मध्येको एक हो तर लगानीको मोडालिटीमा दुई पक्षबीचको मतभेदका कारण सम्झौता हुन सकेको छैन ।

‘दक्षिण एसियाको आर्थिक परिदृश्यलाई आकार दिन चीनको बीआरआई परिवर्तनकारी शक्तिका रूपमा उभिएको छ,’ श्रेष्ठले भने । “कनेक्टिभिटी, पूर्वाधार विकास र आर्थिक सहयोगमा जोड दिने बिआराआइ यस क्षेत्रका राष्ट्रहरूको विकास आकांक्षासँग निर्बाध रूपमा पङ्क्तिबद्ध छ।”

श्रेष्ठले भने, ‘बेल्ट एन्ड रोड इनिसिएटिभ भनेको सडक र पुल निर्माण मात्रै होइन । यो साझा समृद्धिको लागि मार्गहरू सिर्जना गर्ने बारे पनि हो। बीआरआईले परिकल्पना गरेको आर्थिक करिडोरमा नयाँ बजारहरू खोल्ने, व्यापारलाई सहज बनाउने र आर्थिक वृद्धिलाई प्रोत्साहन गर्ने क्षमता छ। हिमालयको मुटुमा बसोबास गर्ने नेपाल जस्ता राष्ट्रहरूका लागि यी पहलहरूले आर्थिक परिदृश्यलाई रूपान्तरण गर्न सक्ने विस्तारित कनेक्टिभिटीका लागि सम्भावनाहरू खोल्छन्।

कार्यक्रममा सिल्क रोड युथ फोरमका उपाध्यक्ष तथा महासचिव यान दोङपिङ, मध्यपुर थिमि नगरपालिकाका उपमेयर विजयकृष्ण श्रेष्ठ, चिनियाँ दूतावासका कमर्शियल काउन्सिलर सि यु, मातृका पौड्याल, परराष्ट्र संस्थानका प्रवक्ता त्सेतान नामग्याल लगायतको उपस्थिति रहेको थियो । कार्यक्रममा जवाहरलाल नेहरु विश्वविद्यालयको सेन्टर फर इनर एशियन स्टडीजका सहायक प्राध्यापक अनिका रेबेका राजभण्डारी र रौनब सिंह खत्री र हौ सिक्सिनलगायतले नेपाल–चीन सम्बन्धका विभिन्न पक्षमा प्रकाश पारेका थिए ।