सत्तारूढ गठबन्धनको तर्फबाट नेपाली कांग्रेसकी सचेतक पुष्पा भुसाल (गौतम) ले प्रतिनिधि सभाको उपसभामुख पदको लागि उम्मेदवारी दिएकी छन्।

माओवादी केन्द्रका प्रमुख सचेतक देवप्रसाद गुरूङ प्रस्तावक र एकीकृत समाजवादीका लक्ष्मीकुमारी चौधरीको समर्थनमा भुसालले उम्मेद्वारी दर्ता गराउनु भएको हो।

मनोनयनपश्चात आजै दिउँसो साढे १ बजे उम्मेदवारहरुको अन्तिम नामावली प्रकाशन हुनेछ भने भोलि दिउँसो ३ बजे निर्वाचन हुनेछ।

२०७० को निर्वाचनमा अर्घाखाँचीबाट समानुपातिक सांसद निर्वाचित भएकी पुष्पा भुसाल विगत लामो समयदेखि नेपाली काँग्रेसको सकृय राजनीतिमा लाग्दै आउनुभएको छ।

कानुनमा स्नातक र राजनीति शास्त्रमा स्नातकोत्तर गर्नुभएको भुसाल नेपाल बार एसोसिएसनमा केन्द्रीय सदस्य समेत भैसक्नुभएको छ। उनी २०१५ सालमा बीपी कोइरालाको मन्त्रिपरिषदमा स्वास्थ्य मन्त्री रहेका बुवा काशीनाथ गौतमकि छोरी हुन्।