काठमाडौं – औषधि उत्पादनका लागि आवश्यक दर्ता प्रक्रिया, परीक्षण र प्रमाणित आधार नपुर्याई स्वास्थ्य मन्त्री प्रदिप पौडेलले ६ महिना देखि ५ वर्षसम्मका बालबालिकालाई स्वर्णविन्दु खुवाउने अभियान सुरु गरेका छन्।

स्वास्थ्य मन्त्री प्रदीप पौडेलले भदौ ५ गते धनगढीमा औपचारिक रूपमा सुरुवात गरेको यो कार्यक्रम नेपालकै प्राचीन आयुर्वेदिक पद्धतिमा आधारित भनिए पनि कुनै वैज्ञानिक प्रमाण, नियामक निकायमा दर्ता र स्वीकृति बिना नै सञ्चालनमा ल्याइएको भन्दै नेपाल पेडियाट्रिक सोसाइटी (नेपास)ले सरकारको उक्त कदमप्रति गम्भीर असहमति जनाएको छ।

नेपासका अध्यक्ष डा. अरुणकुमार न्यौपानेले प्रेस विज्ञप्ति जारी गर्दै वैज्ञानिक प्रमाण, गुणस्तर, जोखिम मूल्यांकन र नियामक पारदर्शिता नहुँदासम्म स्वर्णभस्म–स्वर्णकल्प बालबालिकामा प्रयोग गर्न नमिल्ने बताएका छन्।

‘स्वर्णकल्पले रोग प्रतिरोधात्मक क्षमता वृद्धि गर्छ भन्ने दाबीको आधार पर्याप्त छैन, परीक्षण र दर्ता विवरण सार्वजनिक नभएको कारण नेपास यस अभियानसँग सहमत नभएको विज्ञप्तिमा उल्लेख गरिएको छ।

नेपासले सरकारलाई तत्काल कार्यक्रम स्थगित गर्न र वैज्ञानिक परीक्षण तथा नियामक प्रक्रिया पूरा गरेर मात्र औषधी वितरण प्रक्रिया अघि बढाउन आग्रह गरेको छ।