सुनसरी — लगातारको अविरल वर्षाका कारण सप्तकोसी नदीको पानीको सतह वर्षकै उच्चस्तरमा पुगेको छ। पहाडी जिल्लामा भएको मुसलधारे वर्षाले नदीमा पानीको मात्रा तीव्र गतिमा बढाएको हो।

सप्तकोसीको बहाब प्रतिसेकेन्ड ३ लाख ३० हजार ३६० क्युसेक पुगेको छ, जुन यो वर्षको सबैभन्दा उच्च मापन हो। बहाब बढेसँगै कोशी ब्यारेजका ५६ ढोका खोलिएका छन्।

जोखिम बढेपछि ब्यारेज क्षेत्रमा उच्च सतर्कताको संकेतका रूपमा रातो बत्ती बालिएको छ। सप्तकोसीमा प्रतिसेकेन्ड १ लाख ५० हजार क्युसेकभन्दा बढी बहाब खतराको तह मानिन्छ, जसका कारण हालको अवस्था अत्यन्त संवेदनशील बनेको छ।

संभावित जोखिम घटाउन नेपाल प्रहरी, सशस्त्र प्रहरी बल र नेपाली सेनाका टोली तयारी अवस्थामा राखिएको सुनसरीका प्रमुख जिल्ला अधिकारी धर्मेन्द्रकुमार मिश्रले जानकारी दिए। उनका अनुसार सप्तकोसी आसपासका बस्तीहरूलाई सतर्क रहन निर्देशन दिइएको छ।

स्थानीय प्रशासनले कोशी ब्यारेज, चतरा, पश्चिम कुशाहा र दक्षिणी तटबन्ध क्षेत्रका बासिन्दालाई आवश्यक सावधानी अपनाउन आग्रह गरेको छ।

जल तथा मौसम विज्ञान विभागका अनुसार अविरल वर्षा जारी रहेकाले सप्तकोसीको जलस्तर अझै बढ्ने सम्भावना छ। प्रशासनले आकस्मिक अवस्थाको सामना गर्न उद्धार टोली र राहत सामग्री तयारी अवस्थामा राखेको जनाएको छ।