चेक रिपब्लिक- अरबपति व्यापारी आन्द्रेज बाबिसले चेक गणराज्यको संसदीय निर्वाचनमा विजय हासिल गरेका छन्, तर उनको लोकप्रिय पार्टी एएनओ ले पूर्ण बहुमत हासिल गर्न भने सकेन । प्रारम्भिक परिणामअनुसार, एएनओले करिब ३५ प्रतिशत मत प्राप्त गर्दै २०० सदस्यीय संसदको तल्लो सदनमा ८१ सिट जितेका छन्।

सन् २०१७ देखि २०२१ सम्म प्रधानमन्त्रीका रूपमा सेवा गरेका बाबिसले अब नयाँ गठबन्धन सरकार गठनका लागि वार्ता सुरु गर्ने अपेक्षा गरिएको छ।

बाबिसले साना दक्षिणपन्थी युरो सन्देही दुई दलहरूसँग वार्ता सुरु गर्ने सम्भावना छ। मोटोरिस्ट्स फर देमसेल्भ्स , जसले युरोपेली संघको “ग्रीन डिल” नीतिको विरोध गर्छ, र फ्रिडम एण्ड डाइरेक्ट डेमोक्रेसी पार्टी, जसको नेतृत्व टमियो ओकामुराले गरेका छन्। बहुमत सुनिश्चित गर्न दुवै दलसँग सहकार्य आवश्यक हुनेछ।

एएनओ र मोटोरिस्ट्सबीच केही साझा दृष्टिकोण छन्, किनभने दुवैले ईयूको वातावरणीय नीतिहरू र सन् २०३५ पछि पेट्रोल तथा डिजेल कार बिक्रीमा लगाइने प्रतिबन्धको विरोध गरेका छन्। तर एसपीडीसँगको सम्बन्ध जटिल हुन सक्छ, किनभने उक्त दलले केही अतिदक्षिणपन्थी समूहहरूसँग गठबन्धन गरेको छ र ईयू तथा नाटो सदस्यतामा जनमत संग्रहको समर्थन गर्छ, जसलाई बाबिसले ठाडै अस्वीकार गरेका छन्।

चुनाव अभियानको क्रममा बाबिसले अघिल्लो सरकारले चेक नागरिकहरूलाई बेवास्ता गरेर युक्रेनी शरणार्थीहरूलाई प्राथमिकता दिएको भन्दै आलोचना गरेका थिए। तर उनले एसपीडीको शरणार्थीहरूलाई देशनिकाला गर्ने मागको समर्थन गर्ने सम्भावना कम देखिन्छ।

विश्लेषकहरूका अनुसार, बाबिसले दुई साना दलको अनौपचारिक समर्थनसहित अल्पमत सरकार गठन गर्ने सम्भावना बढी छ।