अंकारा – टर्कीले अमेरिकी सरकारको आग्रह अस्वीकार गर्दै रूसबाट ग्यास आयात निरन्तर गर्ने स्पष्ट पारेको छ। ऊर्जामन्त्री अल्पार्स्लान बायराक्तरले टर्कीले आवश्यक ऊर्जाका लागि रूससहित उपलब्ध सबै आपूर्तिकर्ताबाट ग्यास खरिद गर्न जारी राख्ने बताएका छन्।

उनको भनाइ अमेरिकी पूर्वराष्ट्रपति डोनाल्ड ट्रम्पको वक्तव्यपछि आएको हो। ट्रम्पले पछिल्लो सातामा राष्ट्रपति रेसेप तैयप एर्दोआनसँग भेटपछि टर्कीले पनि नाटो सदस्य राष्ट्रको हैसियतमा रूससँगको तेल तथा ग्यास कारोबार बन्द गर्ने संकेत दिएका थिए।

तर मन्त्री बायराक्तरले यस्तो सम्भावना नकार्दै भने, “हामी नागरिकलाई ग्यास सकियो भन्न सक्दैनौं। ऊर्जाको निरन्तर आपूर्ति गर्न विविध स्रोतमा पहुँच हुनैपर्छ। रूससँगका सम्झौताहरू यथावत् भएकाले टर्कीले ग्यास आपूर्ति रोक्दैन। जाडो नजिकिँदै छ, हामीलाई सकेसम्म धेरै ग्यास चाहिन्छ।”

उनले टर्कीले आपूर्तिकर्ता विविधीकरण गर्ने र घरेलु उत्पादन बढाउने रणनीति अघि बढाइरहेको बताए। “टर्कीमा ग्यासको ठूलो खपत हुन्छ। विविध स्रोतबाट खरिद गर्दा ऊर्जा सुरक्षामा थप मजबुती आउँछ,” उनले भने।

पश्चिमी मुलुकहरूले सन् २०२२ मा युक्रेन युद्ध तीव्र भएपछि रूसबाट ऊर्जा आयात उल्लेख्य मात्रामा घटाएका छन्। युरोपेली संघले २०२७ भित्र रूसी जीवाश्म इन्धन आयात पूर्णरूपमा बन्द गर्ने योजना बनाएको छ। तर हङ्गेरी र स्लोभाकिया जस्ता देश अझै पनि ठूलो मात्रामा रूसी ग्यास तथा तेल आयात गर्छन्।

टर्की युरोपेली संघको सदस्य नभए पनि नाटोको महत्त्वपूर्ण साझेदार हो। उसले युक्रेन युद्धपछि रूसविरुद्ध पश्चिमी प्रतिबन्धमा सामेल नभई ऊर्जा आयात र कूटनीतिक सम्बन्धलाई यथावत् राखेको छ।

यसैबीच, क्रेमलिनले रूसी ऊर्जामाथि लगाइएका प्रतिबन्धलाई अवैधानिक र आत्मघाती बताउँदै युरोपले महँगो विकल्प रोज्नुपर्ने चेतावनी दिएको छ। क्रेमलिन प्रवक्ता दिमित्री पेस्कोभले भने, “ट्रम्पको उद्देश्य अमेरिकी आर्थिक हित सुरक्षित गर्नु हो।” विश्वलाई अमेरिकी तेल र एलएनजीका लागि बढी रकम तिर्न बाध्य बनाउने अमेरिकी नीति भएको उनले बताएका छन्।