काठमाडौं -कक्षा १२ को पूरक परीक्षा आजदेखि सुरु भएको छ। यसअघि भदौ २८ र २९ गतेका लागि तय भएको परीक्षा जेनजी आन्दोलन हिंसात्मक बनेपछि सारिएको थियो।

राष्ट्रिय परीक्षा बोर्डको परीक्षा नियन्त्रण कार्यालयका अनुसार परीक्षा आज र भोलि दुई दिन सञ्चालन हुनेछ।

पहिलो दिन (आज) अनिवार्य अंग्रेजी (००४१), एक विषय मात्र परीक्षा दिने विद्यार्थीका सबै विषय, र दुई विषय परीक्षा दिने विद्यार्थीका लागि सानो कोड भएको विषयको परीक्षा हुनेछ। अनिवार्य अंग्रेजी र नेपाली दुवै विषय दिने विद्यार्थीले आज अंग्रेजी र भोलि नेपाली विषयको परीक्षा दिनुपर्नेछ।

भोलि (बुधबार) दुई विषय परीक्षा दिने विद्यार्थीका लागि ठूलो कोड भएको विषयको परीक्षा हुनेछ।

सबै विषयको परीक्षा बिहान ११ बजेदेखि सुरु हुने परीक्षा नियन्त्रण कार्यालयले जनाएको छ।