काठमाडौँ – काठमाडौँ महानगरपालिकाका मेयर बालेन शाहले छात्रवृत्तिको विवरण नबुझाउने विद्यालयको अनुमति खारेज गर्ने चेतावनी दिएका छन्।

उनका अनुसार हालसम्म महानगरभित्रका ४४० विद्यालयले छात्रवृत्तिको विवरण पेस गरिसकेका छन्। बाँकी विद्यालयलाई पनि शीघ्र विवरण बुझाउन उनले आग्रह गरेका छन्।

मेयर शाहले सामाजिक सञ्जालमार्फत लेख्दै भनेका छन्, “केही विद्यालयले अहिलेसम्म विवरण बुझाएका छैनन्। विवरण नबुझाउने विद्यालयलाई बन्द विद्यालय मानेर काठमाडौँ महानगरपालिका शिक्षा ऐन, २०७५ बमोजिम अनुमति रद्द गरिनेछ।”

उनका अनुसार कानुन कार्यान्वयनपछि यो वर्ष मात्रै २० हजार २८२ विद्यार्थीले करिब २ अर्ब २५ करोड रुपैयाँ बराबरको छात्रवृत्ति प्राप्त गरेका छन्। पहिलो वर्ष १३ हजार, दोस्रो वर्ष १९ हजार विद्यार्थीले छात्रवृत्ति पाएको र यसवर्ष कक्षा १ देखि १० सम्म १६ हजार ९८० र कक्षा ११ मा ३ हजार ३०२ विद्यार्थीले सुविधा पाएको तथ्यांक उनले सार्वजनिक गरेका छन्।