मोरङ – धरान उपमहानगरपालिकाले तीन महिना ढिलो गरी आर्थिक वर्ष २०८२/८३ को नीति तथा कार्यक्रम तथा बजेट सार्वजनिक गरेको छ। शनिबार सम्पन्न १७औं नगरसभामा उपप्रमुख अइन्द्रविक्रम बेघाले कुल २ अर्ब २० करोड ७४ लाख ५९ हजार रुपैयाँको बजेट प्रस्तुत गरे।

बजेटको स्रोतमा आन्तरिक राजस्वबाट ८० करोड ५३ लाख ६५ हजार, संघीय सरकारको अनुदानबाट ८९ करोड २९ लाख, प्रदेश सरकारको अनुदानबाट ७ करोड ७३ लाख ४४ हजार, राजस्व बाँडफाँटबाट ३४ करोड १८ लाख ५० हजार, सडक बोर्डबाट २ करोड र गत वर्षको मौज्दातबाट ७ करोड रुपैयाँ प्राप्त हुने अनुमान गरिएको छ।

खर्चतर्फ सबैभन्दा बढी ६६ करोड ९४ लाख रुपैयाँ सहरी योजना तथा भौतिक पूर्वाधार विकासमा विनियोजन गरिएको छ। त्यसपछि शिक्षा, युवा तथा खेलकुदका लागि ४६ करोड ८५ लाख, स्वास्थ्यका लागि ६ करोड ९९ लाख ९५ हजार, सामाजिक विकासका लागि ४ करोड ८६ लाख ४५ हजार छुट्याइएको छ।

त्यस्तै, आर्थिक विकासका लागि १ करोड २९ लाख, वन, वातावरण, ऊर्जा तथा विपद् व्यवस्थापनका लागि २ करोड ७४ लाख ५० हजार, कानुन तथा न्याय सम्पादनका लागि २० लाख, सार्वजनिक जग्गा संरक्षणका लागि १५ लाख, राजस्व परिचालनका लागि ४३ लाख र नगर भिजन कार्यक्रमका लागि ५ करोड ५ लाख विनियोजन गरिएको छ। साथै, चालु आर्थिक वर्षका लागि धरानका २० वटै वडामा २१ करोड रुपैयाँ छुट्याइएको छ।