काठमाडौँ- वीरगन्जमा हैजा नियन्त्रणबाहिर गएको भन्दै मन्त्रीलाई प्रश्न गर्दा कलैया–२६ सिस्वा महेशपुरकी किरण साहलाई उल्टै पर्सा प्रहरीले शनिबार पक्राउ गरी हिरासतमा राखेको छ। खानेपानीमन्त्री प्रदीपकुमार यादवको सचिवालयमार्फत परेको उजुरीका आधारमा प्रहरीले उनीमाथि विद्युतीय अपराध, संघीय सांसदलाई धम्की दिएको र झुटा समाचार/अफवाह फैलाएको झूटो आरोपमा उनीमाथि मुद्दा चलाइएको हो।

कानुन व्यवसायीहरूले मन्त्रीको उजुरीमा समावेश गरिएका दफा गलत व्याख्या गरिएको बताउँदै प्रहरी अनुसन्धान स्वेच्छाचारी रहेको टिप्पणी गरेका छन्। वरिष्ठ अधिवक्ता टीकाराम भट्टराईका अनुसार मुलुकी अपराध संहिता, २०७४ को दफा ५८ संसद् संस्थालाई जनाउने हो, व्यक्तिगतरूपमा सांसदलाई होइन। संवैधानिक कानुन व्यावसायिक मञ्चका अध्यक्ष ओमप्रकाश अर्यालले नागरिकले पदाधिकारीमाथि आक्रोश पोख्नु अपराध मान्न नमिल्ने स्पष्ट बताएका छन् ।

कानुन व्यवसायीहरूले मन्त्री यादवको दबाबमा प्रहरीलाई प्रयोग गरिएको स्पष्ट देखिएको बताउँदै यसलाई शक्ति दुरुपयोगको खुला उदाहरण भनेका छन्। मन्त्रीले व्यक्तिगतरूपमा पदको प्रयोग गरेर निर्दोष नागरिकलाई थुनाउँदा कानुनी प्रक्रिया नै तोडिएको टिप्पणी गरिएको छ।

संवैधानिक कानुन व्यवसायीहरू भन्छन्, नागरिकले जनप्रतिनिधिलाई जवाफदेही बनाउन प्रश्न गर्नु अपराध होइन, बरु लोकतन्त्रको अधिकार हो। यस्तो अवस्थामा मन्त्री यादवले साधारण नागरिकलाई कारबाही गराउन सक्ने अधिकार छ कि छैन भन्ने प्रश्न उठेको छ।

किरण साह हाल प्रहरी हिरासतमा छिन्।