काठमाडौं – चिकित्सा शिक्षा सुधारका लागि कैलालीको गेटा मेडिकल कलेजमा आइतबारदेखि सत्याग्रह सुरु गरेका डा. गोविन्द केसीको स्वास्थ्य अवस्था चिन्ताजनक रहेको उनका सहयोगीहरूले बताएका छन्।

डा. अमृत जैसीका अनुसार मंगलबार बिहान परीक्षण गर्दा डा. केसीको मुटुको चाल अत्यन्तै न्यून र रगतमा सुगरको मात्रा कम देखिएको छ,मासपेशी दुख्ने, बाउडिने लगायतका समस्या देखिएका छन्।

डा. केसीले निजी मेडिकल कलेजमा एमबीबीएसको सिट वृद्धि र अन्य निर्णयको विरोध गर्दै सत्याग्रह सुरु गरेका हुन्। चिकित्सा शिक्षा आयोगको साउन ३० गतेको बैठकले निजी मेडिकल कलेजमा एमबीबीएस सिट १३० सम्म दिने निर्णय गरेको थियो। डा. केसीको तर्क अनुसार आवश्यक मापदण्ड पुरा नगरेका निजी मेडिकल कलेजमा जथाभावी सिट तोक्दा गुणस्तर खस्कन्छ र स्वास्थ्य सेवा प्रभावित हुन्छ।

डा. केसी भन्छन्, “निजी मेडिकल कलेजहरूको सिट वृद्धि गर्दा नेता र माफियाको झोला भरिन्छ, तर शिक्षाको गुणस्तर खस्किन्छ। गुणस्तर खस्कनु स्वास्थ्य सेवामा ह्रास ल्याउने हो, जुन आम नेपालीको स्वास्थ्यसँग खेलबाड गर्नु जस्तो हो।”

सत्याग्रहका क्रममा डा. केसीले निजी मेडिकल कलेजको सिट वृद्धि फिर्ता गर्न, इलाम, उदयपुर र डडेलधुरामा सरकारी मेडिकल कलेज तथा अस्पताल खोल्न, कैलालीको गेटामा निर्माण सम्पन्न शिक्षण अस्पताल र शैक्षिक कार्यक्रम तत्काल सञ्चालन गर्नुपर्ने लगायतका माग राखेका छन्।

साथै, उनले अघिल्ला सम्झौताअनुसार एकीकृत प्रतिष्ठान ऐन, उच्च शिक्षा ऐन, गैरनाफामूलक मेडिकल शिक्षा र दरबन्दी सम्बन्धी प्रावधान कार्यान्वयन गर्न पनि जोड दिएका छन्।