आङ्कारा – टर्कीले इजरायलसँगको सबै व्यापारिक र आर्थिक सम्बन्ध तोडेको र हवाई तथा समुद्री पहुँचमा प्रतिबन्ध लगाएको घोषणा गरेको छ। यो कदम इस्रायलको गाजामा जारी सैन्य अभियानको प्रतिउत्तरमा आएको हो।

विदेशमन्त्री हाकान फिदानले संसदमा सम्बोधन गर्दै टर्कीले इस्रायली जहाजलाई आफ्ना बन्दरगाहमा प्रवेश गर्न नदिने र टर्कीसँग सम्बन्धित जहाजलाई इस्रायली बन्दरगाहमा जान नदिने जानकारी दिए। उनले भने, “हामी इस्रायलतर्फ हतियार तथा बारुद बोकेका जहाजलाई बन्दरगाहमा प्रवेश गर्न दिंदैनौं, र यस्ता विमानलाई हाम्रा आकाश मार्ग प्रयोग गर्न दिंदैनौं।”

गत अक्टोबर २०२३ मा हमासको आकस्मिक आक्रमणपछि सुरु भएको गाजा युद्धयता टर्की–इजरायल सम्बन्ध झनै बिग्रिएको छ। टर्कीले इजरायलमाथि गाजामा नरसंहार गरेको आरोप लगाउँदै आएको छ। राष्ट्रपति रेसेप तैयप एर्दोगानले इस्रायली प्रधानमन्त्री बेन्जामिन नेतन्याहुलाई “गाजाको जल्लाद” को संज्ञा दिएका थिए र उनको युद्ध अपराध नाजी नेता एडोल्फ हिटलरको भन्दा पनि बढि भयावह भएको बताएका थिए।