काठमाडौं – निर्वाचन आयोगले नागरिक उन्मुक्ति पार्टी (नाउपा) को अध्यक्षमा रञ्जिता श्रेष्ठ नै रहेको औपचारिक निर्णय गरेको छ।

कार्यवाहक प्रमुख निर्वाचन आयुक्त रामप्रसाद भण्डारीका अनुसार राजनीतिक दलसम्बन्धी ऐन र पार्टीको विधानअनुसार आयोगले यस्तो निर्णय गरेको हो। उनले भने, “असन्तुष्ट पक्षले पेस गरेको विवरण ऐन र विधानअनुसार मिलेन।”

यसअघि साउन १५ गते नाउपाका संस्थापक सदस्यहरूको भेलाले श्रेष्ठलाई पदच्युत गर्दै लालवीर चौधरीलाई नयाँ अध्यक्ष बनाउने निर्णय गरेको थियो। लालवीर, नाउपाका संस्थापक अध्यक्ष रेशम चौधरीका बुवा तथा रञ्जिता श्रेष्ठका ससुरा हुन्।

आयोगको निर्णयसँगै रेशम चौधरीको पत्नीलाई अध्यक्षबाट हटाएर आफ्ना बुवालाई अध्यक्ष बनाउने प्रयास असफल भएको छ।