रुपन्देही- रुपन्देही जिल्ला अदालतले राष्ट्रिय स्वतन्त्र पार्टी (रास्वपा) अध्यक्ष तथा पूर्व गृहमन्त्री रवि लामिछानेलाई जमानतमा रिहा गर्न अस्वीकार गरेको छ। न्यायाधीश नारायण प्रसाद सापकोटाको एकल इजलासले २ करोड ७४ लाख ८४ हजार रुपैयाँको बैंक ग्यारेन्टीसहित पेश गरिएको उनको निवेदन खारेज गर्दै साक्षी बयान र प्रमाण संकलन कार्य बाँकी रहेको कारण देखाउँदै छुट नदिने आदेश दिएको हो।

बुटवलको सुप्रिम सहकारी ठगी प्रकरणमा गत चैत २२ गते उच्च अदालत तुलसीपुरको बुटवल इजलासले लामिछानेलाई पुर्पक्षका लागि थुनामा पठाउने आदेश दिएको थियो । उच्च अदालतको आदेशलाई सर्वोच्च अदालतले पनि सदर गरेको थियो ।

उनले आफू सहकारी ठगीमा संलग्न नभएको जिकिर गर्दै बचतकर्ताको बचत फिर्ताको सुनिश्चित आफूबाटै गर्न चाहेको तर्क गर्दै आफ्नो भागको बिगो बराबरको जमानत लिएर रिहा गर्न माग गर्दै जिल्ला अदालत रूपन्देहीमा यही साउन १९ गते सोमबार निवेदन दिएका थिए ।