कास्की — कास्की प्रहरीले ६ किलो ४ सय ग्राम अवैध सुनसहित ११ जना भारतीय नागरिकलाई पक्राउ गरेको छ। जिल्ला प्रहरी कार्यालय कास्कीका प्रमुखका अनुसार उनीहरू सुन–चाँदीको अवैध कारोबारमा संलग्न रहेको प्रारम्भिक अनुसन्धानबाट खुल्न आएको छ।

पक्राउ पर्ने व्यक्तिहरूको साथबाट ४४४ तोला चाँदी र नगद रु ५ लाख १४ हजार ६६५ पनि बरामद गरिएको छ। पक्राउ परेकालाई बरामद सामानसहित आवश्यक कारबाही र थप अनुसन्धानका लागि राजस्व अनुसन्धान कार्यालय बुटवल पठाइने प्रहरीले जनाएको छ।

पक्राउ पर्नेमा महाराष्ट्र, कोलकाता र पश्चिम बङ्गालका विभिन्न स्थानका ४१ वर्षीय राजेन्द्र रामचन्द्र जगताप, ३८ वर्षीय उज्वल भोमिक, ४० वर्षीया सुनिता पवार, ४५ वर्षीय मनिक लाल आदत, ३५ वर्षीय असित वर, ४४ वर्षीय तापस सामन्त, ३५ वर्षीय सन्दीप ढाप, ४१ वर्षीय सोमनाथ पाल, ४७ वर्षीय दीपक सामन्त, ४७ वर्षीय गोविन्द दिण्डा र ४९ वर्षीय प्रोभास माझी रहेका छन्।

प्रहरीका अनुसार, ती सबै पोखरामा लामो समयदेखि सुनचाँदी कालिगढका रूपमा कार्यरत थिए।