काठमाडौँ- संविधान संशोधनको विषयलाई सार्थक निष्कर्षमा पुर्‍याउन नेपाली कांग्रेसले कार्यदल गठन गर्ने निर्णय गरेको छ। कार्यदलले संविधान निर्माणमा सहकार्य गरेका राजनीतिक दल, यस प्रक्रियामा योगदान पुर्‍याएका विज्ञ, विशेषज्ञ तथा सरोकारवाला नागरिक समाजसँग संवाद गर्नेछ। साथै, पार्टीभित्र पनि संविधान संशोधनसम्बन्धी छलफल सञ्चालन गर्ने जिम्मेवारी कार्यदलले पाउनेछ।

कांग्रेस–एमालेबीच सरकार गठनका क्रममा संविधान संशोधनको एजेण्डा अघि सारिएको थियो। तर, एकल रूपमा विधेयक ल्याएर मात्र उद्देश्य पुरा नहुने भएकाले आवश्यक संशोधनका विषयमा सहमति जुटाएर अघि बढ्ने कांग्रेसको धारणा छ।

मुख्य सचिव कृष्णप्रसाद पौडेलका अनुसार कार्यदल आगामी २–३ दिनमा घोषणा हुनेछ। एकजना संयोजकसहित आवश्यकताअनुसार ५ देखि ७ सदस्य रहनेछन्। कांग्रेस केन्द्रीय समिति बैठकको निर्णयअनुसार बन्ने कार्यदलको संयोजकमा संविधान निर्माणमा सक्रिय भूमिका खेलेका पूर्व महामन्त्री कृष्णप्रसाद सिटौलाको नामबारे पार्टीभित्र छलफल भइरहेको एक शीर्ष नेता बताउँछन्।