भैरहवा — सहकारी ठगी र संगठित अपराधसम्बन्धी मुद्दामा पूर्पक्षका लागि थुनामा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले बैंक जमानतमा रिहाइको माग गर्दै जिल्ला अदालत रूपन्देहीमा निवेदन दिएका छन्।

साउन १९ गते दर्ता गरिएको निवेदनमा लामिछानेले मुलुकी फौजदारी कार्यविधि संहिता, २०७४ को दफा ६८ बमोजिम बैंक ग्यारेन्टीमार्फत रिहाइ माग गरेका हुन्। सोही अनुसार उनले दफा ७१ अन्तर्गत आदेश दिन अदालतसँग अनुरोध गरेका छन्।

हालसम्म उक्त निवेदनमाथि बहस सुरु भएको छैन। लामिछानेका कानुनी प्रतिनिधि र सरकारी वकिलबीच बहस भएपछि मात्रै इजलासबाट निर्णय आउनेछ।

अब बहस कहिले हुने र अदालतले रिहाइ आदेश दिने वा नदिने भन्ने विषयमा सबैको निगाह इजलासको निर्णयतर्फ केन्द्रित रहेको छ।