नवलपरासी – बुटवल-नारायणगढ सडक विस्तारको म्याद चौथो पटक थप गरिएको छ । पूर्वी खण्डको म्याद २०८३ श्रावण ७ सम्म र पश्चिम खण्डको म्याद २०८३ श्रावण ५ सम्म थपिएको हो।

नारायणगढ-बुटवल सडक खण्डको दाउन्नेदेखि पूर्व गैंडाकोटसम्मको क्षेत्रलाई पूर्वी खण्ड र दाउन्नेदेखि पश्चिम बुटवलसम्मको क्षेत्रलाई पश्चिम खण्डका रुपमा विभाजन गरेर निर्माण कार्य गरिँदै आएको छ।

२०७५ चैत्रबाट काम सुरु गरेको चिनियाँ ठेकेदार कम्पनीले तोकिएको समयभित्र काम पूरा नगरेकाले म्याद थपिएको हो। चिनियाँ ठेकेदारले पहिलो तीन वर्षभित्र राजमार्ग विस्तारको काम सम्पन्न गर्न नसकेपछि चौथो पटक म्याद थपिएको हो।

चिनियाँ ठेकेदार कम्पनी चाइना स्टेट इन्जिनियरिङ कर्पोरेशनले दुवै खण्डको ११४ किलोमिटर राजमार्ग विस्तार गर्ने ठेक्का १७ अर्ब रुपैयाँमा पाएको थियो। सडक विस्तार परियोजनाका निर्देशक चुडराज ढकालका अनुसार चौथो पटक म्याद थपिए पनि सडक निर्माणको लागत बढ्ने छैन । चिनियाँ ठेकेदार कम्पनी र परामर्शदाताले माघ २०८३ सम्मको समय मागेका थिए। परियोजना कार्यालयले २०८३ साउनसम्ममा काम सम्पन्न गर्ने शर्तमा एक वर्ष म्याद थप गरेको ढकालले बताए। एसियाली विकास बैंकको ऋण सहयोगमा बुटवल-नारायणगढ सडक विस्तार भइरहेको छ।

गैंडाकोटदेखि दाउन्नेसम्मको लागत ९,१३,१८,९५,००० रुपैयाँ छ। दाउन्नेदेखि पश्चिम बुटवलसम्मको लागत ७,८६,३४,००,००० रुपैयाँ छ। ११४ किलोमिटर सडकमध्ये २९ किलोमिटरमा चार लेनको सडक निर्माण गरिनेछ। बुटवल-नारायणगढ क्षेत्रमा पर्ने ७० किलोमिटर सडक बजार क्षेत्रमा ६ लेनको निर्माण गरिनेछ। दाउन्नेको लगभग १४ किलोमिटरमा तीन लेन बनाउने गरी सडक स्तरोन्नतिको काम भइरहेको छ। दाउन्ने सडक १३ मिटर चौडा हुनेछ।

सडक विभागले २०७५ चैत्रमा सुरु भएको राजमार्ग विस्तारको काम गत असारसम्म ७० प्रतिशत मात्र सम्पन्न भएको जनाएको छ।