जनकपुर- महोत्तरीको जलेश्वर कारागारमा एकजना कैदीको मृत्यु भएको छ । कारागारमा रहेका धनुषाको बटेश्वर गाउँपालिका-१ कार्तिकुमरका ५६ वर्षीय जोगेन्द्र महराको मृत्यु भएको हो ।

पहिलेदेखि नै औषधि सेवन गरिरहेका महराको अचानक बेस्सरी पेटदुखेपछि मध्यराति प्रादेशिक अस्पताल जलेश्वरमा भर्ना गरिएको र उपचारको क्रममा शनिबार राति २:३० बजे मृत्यु भएको कारागार प्रशासन प्रमुख अशोक क्षेत्रीले जानकारी दिएका छन् ।

२०३८ सालमा गाउँकै खेतमा भएको आगजनी घटनामा दोषी ठहर गर्दै उनलाई जिल्ला अदालत धनुषाले कैद सजाय सुनाएको थियो । त्यसबेलादेखि फरारका लिस्टमा रहेका उनलाई दुई वर्षअघि प्रहरीले पक्राउ गरी कैद भुक्तानका लागि कारागार चलान गरेको थियो ।