एनभिडियाको शेयर सोमबार १७% ले घट्यो, जसले यसको बजार पूँजीकरणबाट लगभग $५८९ बिलियन कम गराएको छ र यो अमेरिकी कर्पोरेट इतिहासमा एकै दिनमा भएको सबैभन्दा ठूलो घाटा हो। चिनियाँ कृत्रिम बुद्धिमत्ता फर्म डीपसिकबाट बढ्दो प्रतिस्पर्धाको चिन्ता पछि अमेरिकी सेयर बजारमा तीव्र गिरावट आएको हो ।

सोमबार एनभिडियाको शेयर $११८.५८ मा बन्द भयो, जुन कोभिड-१९ महामारीको प्रारम्भिक दिनहरूमा मार्च २०२० पछिको सबैभन्दा ठुलो गिरावट हो। सोमबारको गिरावटले एनभिडियालाई विश्वको सबैभन्दा मूल्यवान सार्वजनिक रूपमा कारोबार हुने कम्पनीको रूपमा पनि हटाएको छ, जसले यसलाई एप्पल र माइक्रोसफ्ट पछि तेस्रो स्थानमा धकेलिदिएको छ ।

डिपसिकले ओपन-सोर्स आर१ मोडेलको सुरुवात गरेपछि यो गिरावट आएको हो। आर्टिफ़िसियल इन्टेलिजेन्सको यो विकासले उच्च एआई-सम्बन्धित खर्चको दिगोपनको बारेमा प्रश्न उठाएको छ।

एनभिडिया आफैंले डीपसिकको नवप्रवर्तनलाई “एक उत्कृष्ट एआई प्रगति” को रूपमा वर्णन गर्दै डिपसिकको तारिफ गरेको छ। यधपी उसले आफ्नो चिपको बजार नघट्ने पनि बताएको छ।

डिपसिकको आगमंसंगे ब्रोडकमको स्टक १७% ले कम भएको छ , जसले बजार मूल्यमा $२०० बिलियन गुमाएको छ । ओरेकल, डेल र सुपर माइक्रो कम्प्युटर जस्ता एनभिडियाका चिपहरूमा धेरै निर्भर डाटा सेन्टर कम्पनीहरूले पनि कम्तिमा ८.७% को तीव्र गिरावट भोग्नु परेको छ ।

फोर्ब्सका अनुसार, ओरेकलका अध्यक्ष ल्यारी एलिसनको कुल सम्पत्ति २७.६ अर्ब डलरले घटेको छ, जुन प्रभावित अर्बपतिहरूमध्ये सबैभन्दा बढी हो। एनभिडियाका सीईओ जेन्सेन हुआङको व्यक्तिगत सम्पत्ति २१ अर्ब डलरले घटेको छ, जुन दोस्रो सबैभन्दा ठूलो व्यक्तिगत घाटा हो।

विगत दुई वर्षको एआई-इन्धनयुक्त स्टक वृद्धिले एनभिडिया जस्ता कम्पनीहरूलाई बजार विश्वासको केन्द्र बनाएको छ। अल्फाबेट, मेटा र अमेजन जस्ता टेक दिग्गजहरूको मागले गर्दा एनभिडियाको शेयर २०२३ मा मात्र २३९% ले बढेको थियो ।

अमेरिका र चीन बीचको एआई प्रतिष्पर्धाको बढ्दो तनावको बीच डिपसिकको जन्म भएको हो । चिप्समा अमेरिकी निर्यात प्रतिबन्धहरूको बावजुद, डीपसिकले ओपनएआईको ओ१ को तुलनामा उत्कृष्ट क्षमताको प्रदर्शन गरेको छ।

डिपसिकको सुरुवात भएसंगै राष्ट्रपति डोनाल्ड ट्रम्पको नेतृत्वमा ह्वाइट हाउसको एआई र क्रिप्टो सल्लाहकारको रूपमा नियुक्त डेभिड स्याक्सले चीनको प्रगतिको प्रतिरोध गर्न नवप्रवर्तनमा नयाँ ध्यान केन्द्रित गर्न आह्वान समेत गरेका छन् ।