काठमाडौं : सरकारले दादुरा–रुबेला विरुद्धको खोप अभियान फागुन १३ देखि चैत ७ गतेसम्म देशभर सञ्चालन गर्ने भएको छ । दादुरा–रुबेला संक्रमणको जोखिमलाई मध्यनजर गर्दै देशभरका करिब ५७ लाख बालबालिकालाई खोप लगाउने लक्ष्य राखिएको छ ।

स्वास्थ्य तथा जनसङ्ख्या मन्त्रालयले नौ महिनादेखि १५ वर्षसम्मका सबै बालबालिकालाई दादुरा–रुबेला खोप दिने भएको छ । स्वास्थ्य सेवा विभागको बालस्वास्थ्य तथा खोप शाखाका प्रमुख डा अभियान गौतमका अनुसार काठमाडौं उपत्यकाका काठमाडौं, भक्तपुर र ललितपुरका सबै र भारतसँग सीमा जोडिएका दादुराबाट अत्यधिक सङ्क्रमित २१ जिल्लाका सबै बालबालिकालाई खोप दिइनेछ ।

‘बाँकी ५१ जिल्लाका बालबालिकालाई पनि खोप अभियानमा सहभागी गराइनेछ’, प्रमुख डा गौतमले भने । परिवार कल्याण महाशाखाका निर्देशक डा विवेककुमार लालले सरकारले सन् २०२६ सम्म दादुरा–रुबेला उन्मूलन गर्ने लक्ष्यका साथ खोप अभियान सञ्चालन गर्न लागेको बताउनुभयो । दादुरा–रुबेला सबैभन्दा बढी फैलने सरुवा रोग हो । एक जनाले १८ जनामा यो रोग फैलाउन सक्छ। ‘दादुरा–रुबेला बढी संक्रामक छ’, खोप शाखाका प्रमुख डा गौतमले भने, ‘त्यसैले गर्दा यो वर्ष देशभर खोप अभियान सुरु गरेका छौँ ।