मोरङ क्षेत्र नम्बर ३ को प्रदेश सभा १ मा नेपाली कांग्रेसले आज मनोनयन दर्ता गराउँदै छ ।

नेपाली कांग्रेसका उमेद्वार शेखरचन्द्र थापाको निधन भएपछि नेपाली काँग्रेसले आज उम्मेदवारी दर्ता गर्न लागेको हो ।जिल्ला निर्वाचन कार्यालय मोरङले आज बिहान १० बजेदेखि १ बजेसम्मको समय उम्मेदवारी दर्ता लिने र त्यसमा दावी विरोधलगायतका प्रक्रिया पूरा गरेर शुक्रबार अन्तिम नामावली प्रकाशन गरिने जनाएको छ ।

आयोगका अनुसार आज १ बजेदेखि २ बजेसम्म उम्मेदवारको सूची प्रकाशन, २ बजेदेखि ५ बजेसम्म उम्मेदवारीविरुद्ध उजुरी दर्ताको समय तोकिएको छ ।उमेद्वारको योग्यतामाथि जाँचबुझका लागि कात्तिक २५ गते दिउँसो १२ बजेसम्मको समय तोकिएको छ भने नाम फिर्ता लिने, अन्तिम नामावली प्रकाशन गर्ने र निर्वाचन चिह्न प्रदान गर्ने काम पनि कात्तिक २५ गते शुक्रबार नै हुनेछ ।

प्रदेश सभा निर्वाचन ऐन २०७४ मा दलको उम्मेदवारको मृत्यु भएमा सोही दलले मात्र मनोनयन दर्ता गराउने र अन्य दलका उम्मेदवारहरुको उम्मेदवारी भने यथावत नै रहने व्यवस्था रहेको छ ।