काँग्रेसभित्रको डा. शेखर कोइराला पक्षले पार्टी सभापति शेरबहादुर देउवा र गठबन्धनका नेताहरुलाई खबरदारी गर्दै चुनाब हार्ने चेतावनी दिएका छन्।

काठमाडौँमा आयोजित खबरदारी सभामा बोल्दै कोइराला निकट काँग्रेस नेताहरुले, प्रत्यक्षको सिट बाँडफाँट र टिकट वितरण न्यायोचित नभए गठबन्धनले चुनाब हार्ने चेतावनी दिएका छन्। कोइराला निकट काँग्रेस नेताहरुले बालुवाटारमा भागवण्डाको हिसाब मिलाएर मात्र चुनाव जित्न नसकिने बताएका छन्।

खबरदारी सभामा बोल्दै कांग्रेस नेता गुरुराज घिमिरेले गुटका नाममा आफ्नो वरिपरिका केही मानिसलाई अवसर दिए पार्टी समाप्त हुने र पार्टीमा न्यायोचित रुपमा टिकट वितरण भए, ४०/६० को गणित पनि आवश्यक नपर्ने बताउनुभएको छ । तर टिकट वितरण न्यायोचित नभए ४० प्रतिशत भन्दा १ प्रतिशत पनि मञ्जुर नहुने र आफुहरु टुलुटुलु हेरेर नबस्ने बताउनुभएको छ।

काँग्रेस नेता जगदिश्वर नगरसिंह केसीले पनि आफूहरुले दिएको नाम समानुपातिकको बन्द सूचीमा समावेश नभएको भन्दै १६ असोजभित्र नसच्याए प्रतिवादमा उत्रिने चेतावनी दिनुभएको छ ।

सभालाई सम्बोधन गर्ने क्रममा कोइराला निकट नेताहरुले , हिजो देउवा आफैंले पनि ४० प्रतिशत भाग खोजेर पार्टी फ़ुटाएको स्मरण गराउंदै, आफुहरुलाई पनि ४० प्रतिशत चाहिने बताएका छन्।