यतिबेला देशैभर डेंगु तिब्र रुपमा फैलिएको छ । डेंगुका बिरामी बढेसँगै अस्पतालमा बिरामीको छाप बढ्न थालेको छ। सस्तो र भरपर्दो सेवा उपलब्ध गराउंदै आएको काठमाडौँको शुक्रराज ट्रपिकल तथा सरुवा रोग अस्पतालमा पनि बिरामीको भीड दिनानुदिन बढ्दै गएको छ ।

बिरामीको चाप बढेपछि अस्पतालले वार्डबाहिरको करिडोरमा आकस्मिक सेवा विस्तार गरेको छ । डेंगुका बिरामी बढेपछि करिडोरमा ५ वटा अतिरिक्त बेडसहित आकस्मिक सेवा विस्तार गरेको अस्पतालले जनाएको छ ।

टेकु अस्पतालको डेंगु क्लिनिकमा अहिले दैनिक २०० भन्दा बढी बिरामी आउने गरेका छन् भने आकस्मिक विभागमा ७० भन्दा बढी बिरामी आउने गरेको अस्पतालले जनाएको छ।

परीक्षणको लागि मनोमानी शुल्क

डेंगु परीक्षणका नाममा प्रयोगशालाले चार गुणा बढी शुल्क लिने गरेको पाइएको छ । राष्ट्रिय जनस्वास्थ्य प्रयोगशालाका अनुसार टेस्ट किटको मूल्य जोडेर पनि चार सय रुपैयाँसम्ममा डेङ्गुको परीक्षण गर्न सकिने छ । तर, सरकारी प्रयोगशालाले पनि डेंगु परीक्षणका लागि चर्को शुल्क लिइरहेका छन् । राष्ट्रिय जनस्वास्थ्य प्रयोगशालामा डेंगु परीक्षण शुल्क आठ सय रुपैयाँ लाग्छ । कतिपय निजी क्लिनिक र प्रयोगशालाले परीक्षणका लागि १२ सयदेखि १ हजार ५ सयसम्म शुल्क लिइरहेका छन् ।

शुक्रराज ट्रपिकल तथा सरुवा रोग अस्पताल टेकुमा भने परीक्षण शुल्क ५ सय लाग्छ ।