बाँके जिल्लाको नेपालगञ्जस्थित धम्बोजी चोक (वीरेन्द्र चोक) मा स्वर्गीय राजा वीरेन्द्रको सालिक राख्ने क्रममा प्रहरी प्रशासनले हस्तक्षेप गरेपछि प्रहरी र स्थानियहरुबीच झडप भएको छ ।

२०६२/६३ को जनआन्दोलनमा चोकमा रहेको स्वर्गीय राजा वीरेन्द्रको सालिक तोडफोड भएको थियो । लामो समयसम्म राष्ट्रिय झण्डा मात्र राखिएको सो स्थानमा आज दरबार हत्याकाण्ड भएको दिनको सन्दर्भ पारेर केही स्वतन्त्र अभियन्ता, राष्ट्रवादी युवा समूह र राप्रपाका नेता कार्यकर्ताहरुले वीरेन्द्रको सालिक पुनःस्थापना गरेका थिए।

सालिक राखेको घटना प्रति प्रहरीले हस्तक्षेप गरेर सालिक निकालेपछि प्रहरी र स्थानीयहरूबीच झडप सुरु भएको हो। झडप भएपछी स्थिति नियन्त्रणमा लिन प्रहरीले हवाई फायर र अश्रुग्याँस प्रहार गरेको छ ।दुई पक्षबीच झडप हुँदा केही युवा घाइतेसमेत भएको राप्रपाका सहायक महामन्त्री ऋषिराज देवकोटाले जानकारी दिनुभएको छ।
यसअघि नेपालगन्जको त्रिभुवन चोकमा पनि सोही समुहले पूर्व राजा त्रिभुवनको सालिक राखेको थियो । प्रहरी र प्रशासनले उक्त सालिक हटाउने प्रयास गरे पनि सर्वसाधारणले चर्को विरोध गरेपछि प्रशासन पछाडी हटेको थियो ।