गृहमन्त्री बालकृष्ण खाँणले नागरिकता प्रमाणपत्रसम्बन्धी समस्या छिट्टै समाधान गरिने बताउनुभएको छ ।

नेपाली कांग्रेस क्षेत्रीय समितिले बाराको कलैयामा आयोजना गरेको जनसभालाई सम्बोधन गर्दै गृहमन्त्री खाँणले मधेसमा नागरिकताको विषय ठूलो समस्या भएको स्वीकार गर्दै मधेसमा जन्मेर हुर्केका नेपाली नागरिकता बिहिन हुन नहुने बताएका हुन् .

कानुन नहुँदा नागरिकताको प्रमाणपत्र वितरणमा समस्या भएको खाँणले बताएका छन् । नागरिकतासम्बन्धी कानुन निर्माणको प्रस्ताव संसदमा रहेको बताउँदै उनले प्रधानमन्त्री शेरबहादुर देउवाले नागरिकतासम्बन्धी ऐन बनाउन राष्ट्रिय सहमति कायम गर्नेतर्फ काम गरिरहेको जानकारी दिए ।

उनका अनुसार ऐन बनेपछि सरकारले नगरपालिकाबाट नागरिकताको प्रमाणपत्र वितरण गर्ने सोच बनाएको छ ।

उनले मधेशी जनतालाई ‘वास्तविक देशभक्त’ जनताको रुपमा प्रशंसा गर्दै देशको माटो र सिमानाको रक्षा गरेकोमा कृतज्ञता व्यक्त गरे ।

सो अवसरमा खाँणले सिम्रौनगढ नगरपालिकाकी उपमेयर रिमादेवी कुशबाहा र तत्कालीन तराई मधेस लोकतान्त्रिक पार्टीका नेता मोहन महतो कोइरी, ओमप्रकाश ठाकुरलगायतका केही नयाँ अनुहारलाई कांग्रेसमा स्वागत गरेका थिए ।

मन्त्री खाँणले जिल्लाको ऐतिहासिक पोखरी झारौखरमा स्वर्गीय भागवतप्रसाद यादवको शालिक अनावरण गरेका हुन् । नेपाली कांग्रेस राष्ट्रियताको जगमा उभिएको बताउँदै उनले सबै भूगोल, वर्ण र धर्मका नेपालीलाई एकताबद्ध गरेर नेपाल बलियो र सक्षम बन्ने विश्वास व्यक्त गरे ।

उनले मधेस प्रदेशलाई देशकै बलियो प्रदेश बनाउन काङ्ग्रेसले नेतृत्व लिने विश्वास दिलाए ।