जयनगर–कुर्था रेल सेवा नियमित सञ्चालनमा आएपछि स्थानीयवासी उत्साहित भएका छन् ।

प्रधानमन्त्री शेरबहादुर देउवा र उनका भारतीय समकक्षी नरेन्द्र मोदीले शनिबार भारतको नयाँ दिल्लीबाट रेल सेवाको उद्घाटन गरेका हुन् ।

आइतबार बिहान ८.३० बजे छुटेको रेल १०.१५ बजे जनकपुर स्टेशन पुगेको थियो ।

पहिलो दिन जयनगरदेखि कुर्था र कुर्थाबाट जयनगरसम्मको रेल सामान्य र एसी दुवै डिब्बामा यात्रुले खचाखच भएको नेपाल रेलवे कम्पनीका महाप्रबन्धक निरञ्जन झाले जानकारी दिनुभयो ।

निर्धारित समय अनुसार नियमित रेल चल्न थालेको उनले बताए ।

उनका अनुसार दिनमा दुई पटक सेवा दिने तालिका रहेको छ । उनले जयनगरबाट बिहान ८ः३० र ३ बजे र अर्को रेल १०ः३० र ५ः१५ बजे कुर्थाबाट छुट्ने जानकारी दिए ।