आउँदो बैशाख ३० गते हुने स्थानीय तहको चुनावका लागि निर्वाचन कार्यालय चितवनले मतदाता नामावली अद्यावधिकको काम अघि बढाइएको छ ।

निर्वाचन कार्यालयले फागुन १९ गते सात वटा स्थानीय तहका ९८ वडामा फोटोसहितको नामावली पठाउने तयारी गरेको छ । वडामा फोटोसहितको नामावली पठाएपछि २० गतेबाट २६ गतेसम्म दाबी विरोधको समय तोकिएको निर्वाचन कार्यालय चितवनका जिल्ला निर्वाचन अधिकारी भिमसेन कार्कीले जानकारी दिनुभयो ।

मतदाताले सम्बन्धित वडामा गएर नाममा त्रुटी भए सच्याउन तथा मतदानस्थल परिवर्तन गर्न पाउने उहाँले बताउनुभयो । एउटै वडा भित्रका मात्रै मतदानस्थल स्थल परिवर्तन गर्न पाइने समेत उहाँले बताउनुभएको छ ।

वडाबाट दाबी विरोध भएर आएपछि २७ गते नामावली निर्वाचन आयोगमा पठाइनेछ । आयोगबाट अद्यावधिक भएर आएपछि अन्तिम नामावली प्रकाशित गरिनेछ । उहाँका अनुसार यस पटक तीन लाख ९९ हजार ८७१ जनाले मतदाता नामावलीमा नाम दर्ता गराएका छन्। यि सबै नामावली आयोगमा पठाइनेछ ।

यस पटक चितवनमा ८६ हजार नयाँ मतदाता थपिएका छन् । गत २०७४ सालको स्थानीय तहको निर्वाचनमा चितवनमा तीन लाख १३ हजार तीन जना मतदाता थिए । सर्वसाधारणको सहजताका लागि प्रशासन कार्यालय र निर्वाचन कार्यालयबाट मतदाता नामावली दर्ताको व्यवस्था मिलाइएको थियो ।