पूर्वी चितवनको राप्ती नगरपालिकामा बर्ड फ्लु भेटिएको छ ।

राप्ती नगरपालिका ६ स्थित अनिता पशुपक्षी कृषि फर्मका कुखुरामा बर्ड फ्लु भेटिएको हो । फर्ममा पालिएका दुई हजार कुखुरामध्ये बर्ड फ्लुले दुई सय कुखुरा मरिसकेको प्रमुख जिल्ला अधिकारी अस्मान तामाङले जानकारी दिनुभयो ।

कुखुरा मर्न थालेपछि २५ माघमा कुखुराको नमुना लिएर बर्ड फ्लु परीक्षण गरिएकोमा बुधबार पुष्टि भएको हो ।

बर्ड फ्लुको रोकथाम तथा नियन्त्रणका लागि बुधबार केन्द्रबाटै बर्ड फ्लु देखिएको फर्मको सय मिटर आसपासमा पालिएका पक्षीहरू नष्ट गर्न निर्देशन दिइएको थियो ।

सोहीअनुसार आज फर्म आसपासका पक्षीहरू नष्ट गर्ने तयारी भइरहेको कृषि विज्ञ केन्द्र चितवन, भेटेनरी अस्पताल तथा पशुविज्ञ केन्द्र भरतपुरका निमित्त प्रमुख प्रभात न्यौपानेले जानकारी दिनुभयो ।