चितवनमा पहिलो दिन १६ हजार २२८ विद्यार्थीले कोरोना भाइरसविरुद्धको मोडर्ना खोप लगाएका छन् । चितवनका पालिकाहरुमा १२ देखि १७ वर्ष उमेर समूहका विद्यार्थीहरुलाई आइतबारदेखि खोप लगाउन सुरु गरिएको छ ।

स्वास्थ्य कार्यालय चितवनका प्रमुख दीपक तिवारीले २७ गतेसम्म विद्यार्थीलाई खोप दिने कार्यक्रम रहेको बताउनुभयो । उहाँका अनुसार विद्यालयमै खोप केन्द्र राखेर विद्यार्थीलाई खोप दिने कार्यक्रम चलिरहेको छ । खोप लगाउने उमेर समूहका २०० विद्यार्थी भएका प्रत्येक विद्यालयमा खोप केन्द्र राखिएको छ ।

चितवनका ४ पालिकामा आइतबार खोप लगाइएको थियो । खैरहनी नगरपालिकाले यसअघि नै खोप लगाइसकेको छ । आइतबार भरतपुर महानगरपालिकामा ११ हजार १५७ विद्यार्थीले खोप लगाएका छन् । माडीमा १ हजार ६३२, रत्ननगरमा २ हजार ५१६ र कालिकामा ९२३ विद्यार्थीले कोरोनाविरुद्धको खोप लगाएका छन् ।

भरतपुर महानगर स्वास्थ्य शाखा प्रमुख दीपक सुवेदीले आइतबार महानगरका ३२ विद्यालयमा खोप केन्द्र बनाएर विद्यार्थीलाई खोप लगाइएको र आज सोमबार पनि त्यतिकै हाराहारीमा खोप केन्द्र बनाइएको बताउनुभयो ।